ધર્મ વાક્ય

૧ . 'ધર્મ ચર' : ધર્મ નું આચરણ કરો (આચાર ધર્મ )

૨. ' ધર્મ એ , 'જે સર્વ ને ધારણ કરે '--- ધારયતિ ઇતિ ધર્મ 

૩. ' ધર્માચરણ ' માટે , ' વિદ્યા - વિનય - પાત્રતા - ધન ' પ્રાપ્ત કરવા પડે છે .

૪.' ધર્માચરણ ' થી જ , સુખ પ્રાપ્ત થાય છે .

૫. ધર્મ થી જ , અર્થ અને કામ સિદ્ધ થાય છે .(વેદ વ્યાસજી )

ઈશ્વર ને મેં રડતા જોયા

આ જગમાં આવીને, માનવ , માનવતા વિસરતાં જોયા 

પૈસા માટે  આંખ   મીંચીને,   કાળા  ધોળા  કરતા  જોયા 

સત્યાસત્ય વિવેક ભૂલીને , સ્વાર્થ ને સત્ય સમજતા જોયા 

ભોગો  માટે દીન બની , કીડા સમ જીવન જીવતા જોયા 

સૃષ્ટી માં આવીને , સર્જનહારને ભૂલતા માનવ  જોયા 

ત્યારે સત્ય હકીકત કહું છું , ઈશ્વર ને મેં રડતાં જોયા ....(૧)

ઈશ્વરની સુંદર સૃષ્ટીમાં , વિકારી ઓને ભમતા જોયા 

રૂપ જોઇને લટ્ટુ થાતાં, વિચલિત મનના માનવ જોયા 

કોમળ કંઈ પુષ્પો ને મેં તો, વણખીલ્યે ચુંટાતા જોયા 

સુંદરતા જોઈ ના હસતાં , હણીને હર્ષિત થાતાં જોયા 

પૂજન છોડી સુંદરતા નું ,   લુંટનાર  શિકારી   જોયા 

ત્યારે સત્ય હકીકત કહું છું , ઈશ્વર ને રડતાં   જોયા....(૨)

ભાઈ ભાઈ ની ભાવના ભૂલી , ખોટા ભેદો ધરતાં જોયા 

સમાનતાની વાતો કરતાં , ઉંચ નીચ ગણનારા જોયા 

દંભ અહં જીવનમાં ભરીને , વર્તનમાં તદન ઉલ્ટા જોયા 

કામ ન કરવું નામ ધરીને , મોટા મોટા ફરતાં  જોયા 

સેવાના નામે જયારે મેં , સહુ ને મેવા જમતાં જોયા 

ત્યારે સત્ય હકીકત કહું છું , ઈશ્વર ને મેં રડતાં જોયા ....(૩)